கருவறை

ஒவ்வொரு ஆன்மாவும் இப்பூவுலகில் ஒரு குறிப்பிட்ட நோக்கத்துடன் பிறக்கிறது. சிலர் தங்களுக்காக வாழ்கின்றனர்; சிலர் சமூகத்திற்காக வாழ்கின்றனர்; ஆனால் மிகச் சிலர் மட்டுமே இறையருளால் மனித குலத்தின் ஆன்மீக விழிப்புணர்விற்காக வாழத் தேர்ந்தெடுக்கப்படுகின்றனர். அத்தகைய அரிய ஆன்மீக சிந்தனைகள் உள்ளவர் தான் சிவ சோடசி அகஸ்திய தாமரைச்செல்வி அவர்கள்.

சேலம் மாநகரின் கிச்சிபாளையம் பகுதியில், தந்தையார் தெய்வத்திரு.மா.இராமலிங்கம் (முன்னாள் சட்டமன்ற உறுப்பினர்) தாயார் திருமதி.இரா.விமலா அவர்களுக்கு ஐந்தாவது திருமகளாக 30 ஜூலை 1977 அன்று பிறந்தார். சிறுவயதிலிருந்தே இறைநம்பிக்கை, பக்தி மற்றும் ஆன்மீக சிந்தனைகளின் மீது தனித்துவமான ஈர்ப்பைக் கொண்டிருந்தார்.

அவரது குழந்தைப் பருவம் சாதாரணமானதாகத் தோன்றினாலும், அதன் ஆழத்தில் அசாதாரணமான ஆன்மீக அனுபவங்கள் மறைந்திருந்தன. கோயில் கருவறைகளில் விளையாட்டாகச் சென்ற தருணங்களிலேயே அவர் பெற்ற தெய்வீக அனுபவங்கள், அவரது வாழ்வின் திசையை மாற்றியமைத்தன. காலப்போக்கில் அவை வெறும் அனுபவங்களாக இல்லாமல், இறையின் உண்மையைத் தேடும் ஆழமான ஆன்மீகப் பயணமாக மாறின.

திருச்சி மாவட்டம் முத்தரசநல்லூரைச் சேர்ந்த திரு.ரா.துரை அவர்களைத் திருமணம் செய்து கொண்டு, இல்லற வாழ்க்கையை மேற்கொண்ட அவர், குடும்பப் பொறுப்புகளுடன் ஆன்மீகத் தேடலையும் சமநிலையுடன் தொடர்ந்தார். வாழ்க்கையில் நிகழ்ந்த பல்வேறு அனுபவங்களும், இறையருளின் மறைமுக வழிநடத்தல்களும், அவரை மேலும் ஆழ்ந்த தன்னுணர்வு நிலைக்கு அழைத்துச் சென்றன.

கோயில் கருவறைகள் தொடர்பான ஆன்மீக ஆய்வுகளின் வழியாக, மனித ஆன்மாவின் பிறப்பின் நோக்கம், இறை உண்மையின் சாரம் மற்றும் பரம்பொருளின் பேராற்றல் ஆகியவற்றை அவர் ஆழமாக உணர்ந்தார். இந்த உணர்வுகள் அவரது வாழ்வில் ஒரு திருப்புமுனையாக அமைந்தன. மனிதன் வெளியில் தேடுகின்ற இறை உண்மை, உண்மையில் அவனது அகத்திலேயே உறைகிறது என்ற பேருண்மையை அவர் அனுபவத்தின் மூலம் அறிந்தார்.

தான் பெற்ற இந்த ஞானம் தனக்குள் மட்டுமே நிலைத்திருக்கக் கூடாது; அது உலக மக்களுக்கும் பயன்பட வேண்டும் என்ற உயர்ந்த எண்ணத்துடன் ஆன்மீக வழிகாட்டுதல் பணியில் தன்னை அர்ப்பணித்தார்.

மேலும் மனிதன் இறையை வெளியே தேடுவதை விட தன்னுள் இருக்கும் தன்னுடைய ஆன்மாவை உணர்ந்து, மனதின் மாயைகளைக் கடந்து, அகத்திலுள்ள பரம்பொருள் பேரொளியை உணர வேண்டும் என்ற அவரது உயர்ந்த நோக்கத்தின் பயனாக உருவானது தான் கருவறை (ஆன்மா தனக்குள் தன்னை அறியும் புனித பயணம்)

அவரது ஆன்மீகப் பயிற்சிகள் மற்றும் வழிகாட்டுதல்கள், ஆன்மா தன்னிலை உணர்தல், தியானம், இறை வழிபாட்டின் உண்மைப் பொருள், உள்ளுணர்வு வளர்ச்சி மற்றும் பரம்பொருள் அனுபவம் போன்ற உயர்ந்த ஆன்மீகப் பாதைகளை உள்ளடக்கியவை. எளிமையான மொழி, அனுபவ உண்மை மற்றும் நடைமுறை அணுகுமுறை ஆகியவற்றின் மூலம் பலரது ஆன்மீக வாழ்வில் புதிய விழிப்புணர்வை ஏற்படுத்தி வருகிறார்.

ஆன்மீக வழிகாட்டுதல்களோடு, தமிழ் பாரம்பரிய இயற்கை மருத்துவ முறைகளில் மனித உடல் நலம் மனநலம் காக்கும் பணிகளைச் செய்து வருகிறார். உடல், மனம் மற்றும் ஆன்மா ஆகிய மூன்றின் சமநிலையே முழுமையான நல்வாழ்விற்கு அடிப்படை என்பதை வலியுறுத்தி, பலருக்கு வழிகாட்டி வருகிறார்.

மேலும், தமிழ் ஆன்மீக மரபு, பக்தி இலக்கியம் மற்றும் பாரம்பரிய கலைகளைப் பாதுகாப்பதில் தனித்துவமான பங்களிப்பை வழங்கி வருகிறார். தஞ்சாவூர் ஓவியங்கள், பக்தி சார்ந்த கலைப் படைப்புகள் மற்றும் கோவில் பாரம்பரியக் கலை வடிவங்களின் மூலம் தென்னிந்திய ஆன்மீக கலாச்சாரத்தின் அழகியலையும் ஆன்மீகப் பாரம்பரியத்தையும் உயிர்ப்புடன் பேணுகிறார்.

அகஸ்திய தாமரைச்செல்வி அம்மா அவர்கள், ஆன்மாவின் தன்னுணர்வு பாதையில் பயணிக்க விரும்பும் ஆயிரக்கணக்கான மக்களுக்கு வழிகாட்டும் ஒளிவிளக்காகத் திகழ்கிறார். மனிதன் தன்னுள் உறையும் தெய்வீகத்தை உணர்ந்து, பரம்பொருளுடன் ஒன்றிய வாழ்வை அடைய வேண்டும் என்ற உயர்ந்த நோக்கத்துடன் அவரது ஆன்மீகப் பணி தொடர்ந்து நடைபெற்று வருகிறது.

அவரது வாழ்க்கை, ஒரு சாதாரண மனிதரின் வாழ்க்கை வரலாறு மட்டுமல்ல; ஆன்மாவைத் தேடி இறையுண்மையை உணர்ந்த ஒரு தெய்வீகப் பயணத்தின் சாட்சியமாகும். தான் உணர்ந்த ஆன்மா பற்றிய விழிப்புணர்வையும், இறையையும், ஆன்மீக வழிபாடுகளையும் தன்னைப் போன்றோர்களும் உணர்ந்து வாழ்க்கையில் அனைத்து நலன்களையும் வளங்களையும் பெற்று இன்புற்று வாழவேண்டும் என்பதே சிவ சோடசி அகஸ்திய தாமரைச்செல்வி அம்மா அவர்களின் உயர்ந்த நோக்கமாகும்.